លោក ឃួង ស្រេង កំពុងរៀបចំសំណើទៅគណៈកម្មការប្រយុទ្ធនឹងជំងឺកូវីដ-១៩ ពិចារណាឱ្យបើកក្លិបកម្សាន្ត រង្គសាល និងខារ៉ាអូខេឡើងវិញ
ភ្នំពេញ៖ អភិបាលរាជធានីភ្នំពេញ លោក ឃួង ស្រេង នៅព្រឹកថ្ងៃទី៣ ខែវិច្ឆិកានេះបានប្រាប់ EAC News ថាលោកកំពុងរៀបចំសំណើរទៅគណៈកម្មការប្រយុទ្ធប្រឆាំងជំងឺកូវីដ-១៩ ដើម្បីអនុញ្ញាតឱ្យបើកដំណើរការឡើងវិញនូវអាជីវកម្មក្លិបកម្សាន្ត រង្គសាល និងខារ៉ាអូខេ។ ការគ្រោងរៀបចំសំណើបែបនេះបន្ទាប់ពីការប្រកាសជាផ្លូវការបើកសង្គមសេដ្ឋកិច្ចកម្ពុជាឡើងវិញដោយសម្ដេចតេជោ នាយករដ្ឋមន្ត្រី ហ៊ុន សែន កាលពីថ្ងៃទី១ ខែវិច្ឆិកា ក្នុងឱកាសអញ្ជើញបិទយុទ្ធនាការចាក់វ៉ាក់សាំងដូសទី១ដល់ពលរដ្ឋអាយុ៦ឆ្នាំឡើង និងបើកយុទ្ធនាការចាក់វ៉ាក់សាំងដល់កុមារអាយុ៥ឆ្នាំ។
លោក ឃួង ស្រេង បានបញ្ជាក់ប្រាប់ EAC News ទៀតថា៖ «យើងមានទៅចង់បិទអីឱ្យតែអត់មានឆ្លង។ ឥឡូវយើងកំពុងរៀបចំសុំទៅគណៈកម្មការប្រតិបត្តិដើម្បីប្រជុំវិភាគដើម្បីកំណត់នូវបញ្ហានេះ។ ក្រោយថ្ងៃ១១ វិច្ឆិកា នឹងមានការប្រែប្រួលលើបញ្ហានេះ។ [...] ខ្ញុំមិចហ៊ានឱ្យបើកឬមិនបើក វាអាស្រ័យលើគណៈកម្មការប្រយុទ្ធប្រឆាំងកូវីដ-១៩ដើម្បីប្រជុំពិភាក្សាបញ្ហានេះ ហើយវាយតម្លៃឱ្យបានត្រឹមត្រូវទើបយើងហ៊ានបើកការងារនេះ ព្រោះអាជីវកម្មឌីស្កូតែក ខារ៉ាអូខេ វាជាកន្លែងសប្បាយភាព តែវាទទួលហានិភ័យខ្ពស់ និងងាយរងគ្រោះដូច្នេះ យើងត្រូវប្រុងប្រយ័ត្នលើរឿងហ្នឹង» ។
កាលពីថ្ងៃទី២ ខែវិច្ឆិកា អភិបាលរាជធានីភ្នំពេញ លោក ឃួង ស្រេង បានបញ្ជាទៅអាជ្ញាធរខណ្ឌទាំង១៤ឲ្យអនុវត្តន៍ឲ្យបានម៉ឺងម៉ាត់នូវវិធានការរដ្ឋបាលរបស់សាលារាជធានីក្នុងការផ្អាកបណ្ដោះអាសន្នអាជីវកម្មដែលមានហានិភ័យខ្ពស់រួមមានអាជីវកម្មខារ៉ាអូខេ រង្គសាល និងឌីស្កតែក រហូតដល់ថ្ងៃទី១១ ខែវិច្ឆិកា៕